2 Kings 9

UJehu Ugcotshwa Ukuba Yinkosi yako-Israyeli

1Umphrofethi u-Elisha wabiza enye indoda exukwini labaphrofethi wathi kuyo, “Khwica isambatho sakho ebhantini ubusuthatha iqhagana lamafutha leli, uye eRamothi Gileyadi.

2Ekufikeni kwakho khonale, ubodinga uJehu indodana kaJehoshafathi, indodana kaNimishi. Ufike umthathe, umsuse kubangane bakhe ubusumngenisa endlini engaphakathi. 3Ube usuthatha iqhagana lamafutha uwathele ekhanda lakhe, ube usubika uthi, ‘Ilizwi likaJehova lithi: Ngikugcoba ubukhosi bako-Israyeli.’ Ube usuvula umnyango ubaleke; ungabophuza.”

4Ngakho ijaha leli, umphrofethi, waya eRamothi Gileyadi. 5Ekufikeni kwakhe khonale wafumana izikhulu zebutho zihlezi ndawonye, wasesithi kuzo, “Mlawuli, ngilombiko kuwe.” UJehu wabuza wathi, “Ngokabani phakathi kwethu?” Yena waphendula wathi, “Ngowakho mlawuli webutho.”

6UJehu wasukuma wangena endlini. Umphrofethi wathela amafutha ekhanda likaJehu wasebika ukuthi, “Ilizwi likaJehova ka-Israyeli lithi: ‘Ngigcoba wena ukuba ube yinkosi phezu kwabantu bakaJehova, u-Israyeli.

7Kumele ubhubhise indlu ka-Ahabi inkosi yakho, njalo ngizaphindisela igazi lezinceku zami abaphrofethi kanye legazi lezinceku zonke zikaJehova elachithwa nguJezebeli. 8Indlu ka-Ahabi izabhujiswa. Ngizaqeda ko-Ahabi bonke abesilisa ko-Israyeli, isigqili loba okhululekileyo. 9Indlu ka-Ahabi ngizayenza lokhu engakwenza ekaJerobhowami indodana kaNebathi kanye lokwenzakala endlini kaBhahasha indodana ka-Ahija. 10UJezebeli, yena uzadliwa yizinja elizweni laseJezereli; kayikungcwatshwa muntu.’ ” Wasevula umnyango, wabaleka.

11UJehu uthe ephuma lapho esebuyele kwabanye abalawuli, omunye wabo wambuza wathi, “Kulungile konke na? Uhlanya lolu lube luzofunani kuwe?” UJehu wathi, “Liyamazi umuntu lo kanye lezinto azikhulumayo.”

12Abalawuli basebesithi, “Kakusilo iqiniso lokho! Sitshele.” UJehu wathi, “Nanku angitshele khona: ‘Ilizwi likaJehova lithi: Ngiyakugcoba ube yinkosi ko-Israyeli.’ ”

13Baphanga bathatha izambatho zabo bazendlala ezinyaweni zakhe ezikhwelweni. Bavuthela icilongo bamemeza besithi, “UJehu useyinkosi!”

UJehu Ubulala UJoramu Lo-Ahaziya

14Ngakho uJehu indodana kaJehoshafathi, indodana kaNimishi wavukela uJoramu. (UJoramu labo bonke abako-Israyeli babevikela iRamothi-Gileyadi kuHazayeli inkosi yama-Aramu, 15kodwa inkosi uJoramu yayisibuyele eJezereli ukuze yelatshwe amanxeba okulinyazwa ekulweni lama-Aramu kulwiwa loHazayeli inkosi yama-Aramu.) UJehu wathi, “Nxa lifuna lokho, akungabikho loyedwa ozaphuma emzini ukuba ayefikisa ilizwi eJezereli.”

16Wasekhwela enqoleni yakhe yokulwa waya eJezereli, ngoba uJoramu wayephumulela khonale njalo u-Ahaziya inkosi yakoJuda wayehlele khona ukuba ayembona.

17Umlindi owayemi emphotshongweni eJezereli wathi ebona amabutho kaJehu esiza, wamemeza esithi, “Ngibona impi ezayo.” UJoramu wathi, “Thumela umgadi webhiza abahlangabeze ayebabuza ukuthi, ‘Liza ngokuthula na?’ ”

18Umgadi webhiza wasuka wayahlangabeza uJehu wathi, “Inkosi ingithume ukuba ngibuze ngisithi, ‘Uza ngokuthula na?’ UJehu waphendula wathi, “Ulani lakho ukuthula na? Ngena ngemuva kwami.” Umlindi wabika wathi, “Isithunywa sesifikile kubo, kodwa kasiphenduki.”

19Ngakho inkosi yathuma umgadi webhiza wesibili. Esefikile kubo wathi, “Inkosi ithi: ‘Liza ngokuthula na?’ ” UJehu waphendula wathi, “Ulani lakho ukuthula na? Ngena ngemuva kwami.”

20Umlindi wabika wathi: “Usefikile kubo, kodwa kukhanya kaphenduki. Ugijima sengathi nguJehu indodana kaNimishi njalo utshayela sengathi luhlanya.”

21UJoramu wakhwaza wathi, “Bophani inqola yami yokulwa.” Inqola yokulwa ithe isilungisiwe, uJoramu inkosi yako-Israyeli kanye lo-Ahaziya inkosi yakoJuda bagada, basuka omunye ekweyakhe inqola yokulwa lomunye laye ekweyakhe, behlangabeza uJehu. Bahlangana laye esivandeni sesiqinti esasikade singesikaNabothi umJezereli. 22UJoramu uthe ebona uJehu wambuza wathi, “Uza ngokuthula na, Jehu?” UJehu wathi, “Kambe kungaba lokuthula njani khona kugcwele izithombe lobuthakathi bukanyoko uJezebeli na?”

23UJoramu wafulathela wabaleka, ememezela ku-Ahaziya esithi, “Ukuhlamuka, Ahaziya!”

24UJehu wakhokha umtshoko wakhe waciba uJoramu esiphangeni ngomtshoko wakhe. Umtshoko wahle wangena enhliziyweni yakhe yena wathi votshololo enqoleni yakhe yokulwa.

25UJehu wathi kuBhidikhari, owayeyisikhulu sakhe sezinqola zokulwa, “Dobha isidumbu sakhe uyesiphosela ensimini eyayingekaNabothi umJezereli. Uyakhumbula mhla sasigadile sobabili enqoleni yokulwa ngemuva kuka-Ahabi uyise mhla uJehova enza lesisiphrofetho ngaye esithi, 26‘Izolo ngibone igazi likaNabothi lelamadodana akhe, kutsho uJehova, ngeqiniso ngizakwenza ulihlawulele kulesisivande, kutsho uJehova.’ Ngakho umthathe, uyemphosela ensimini leyana, njengokutsho kwelizwi likaJehova.”

27U-Ahaziya inkosi yakoJuda esebone lokhu okwakwenzakele wabaleka wahamba ngomgwaqo esiya eBhethi-Hagani. UJehu waxotshana laye ememeza esithi, “Mbulaleni laye!” Bamlimaza enqoleni yakhe yokulwa endleleni yokuya eGuri phansi kwe-Ibhiliyami, kodwa wabaleka waya eMegido lapho ayafela khona.

28Izinceku zakhe zamthwala ngenqola yokulwa zamusa eJerusalema zayamngcwaba laboyise ethuneni lakhe eMzini kaDavida.

29(Ngomnyaka wetshumi lanye kaJoramu indodana ka-Ahabi, u-Ahaziya waba yinkosi yakoJuda.)

Ukubulawa KukaJezebeli

30Ngakho uJehu waya eJezereli. UJezebeli wathi ekuzwa lokho, wazicomba ngesibhuda emehlweni weluka inwele zakhe waselunguza ngewindi. 31UJehu uthe engena esangweni, wambuza wathi, “Uza ngokuthula na, Zimiri, wena mbulali wenkosi yakho?”

32Yena wakhangela phezulu ewindini wabuza wathi, “Ngubani ongakimi na? Ngubani?” Abathenwa ababili loba abathathu bakhangela phansi kuye. 33UJehu wathi, “Msakazeleni phansi!” Ngakho basebemsakazela phansi, elinye igazi lakhe lachaphakela emdulini lasemabhizeni ayesegidagida emnyathela ngamasondo.

34UJehu wangena wafika wadla njalo wanatha. Wathi, “Ake limthathe lo owesifazana oqalekisiweyo liyemngcwaba, ngoba eyindodakazi yenkosi.” 35Kodwa bathe sebethi bayathatha isidumbu bafumana sekusele ikhanda lenyawo lezandla kuphela.

36Babuyela bayatshela uJehu yena owathi, “Leli yilizwi likaJehova alikhuluma ngenceku yakhe u-Elija umThishibi lisithi: ‘Esiqintini esiseJezereli izinja zizakudla inyama kaJezebeli,

37lesidumbu sikaJezebeli sizakuba njengomquba osegangeni elizweni laseJezereli ukuze kungabi khona ozakutsho ukuthi, ‘Lo nguJezebeli.’ ”